Pordenonelegge al torne a tacâ des poesiis dai zovins

Ancjemò une volte e je la poesie a ispirâ lis iniziativis de fondazion “Pordenonelegge.it”, che e à vierzût miercus ai 10 il bant a pro dai zovins autôrs. La seste edizion dal premi “I poeti di vent’anni” (“I poetis di vincj agns”), e je pensade di fat par cui che al è nassût dal prin di Zenâr dal 1994 ai 31 di Dicembar dal 2003 e che al à (o e à) publicât il so libri di poesie vie pal 2023. “Pordenonelegge” al rinove cussì une atenzion za consolidade par cui che al scrîf poesie e al à mancul di 30 agns: une oportunitât par individuâ lis vôs plui zovinis, indagant i mûts, i stimui, la creativitât. Dentri dai 31 di Lui e sarà publicade la liste dai trê libris finaliscj e a Setembar, dilunc di pordenonelegge 2024, e je previodude la proclamazion dal vincidôr. La ultime edizion e je stade vinçude de zovine Diletta D’Angelo cul so libri di esordi “Defrost”. (A.I.) – 10.01.2024