Premi dal Salon dal libri di Turin a une poetesse ucraine in Friûl

Si clame Natalia Bondarenko, e ven de Ucraine, ma e je a stâ di agns in Friûl, a Cjampfuarmit, une des protagonistis dal Salon internazionâl dal libri di Turin. Ae sô opare al è stât assegnât il secont premi dal concors nazionâl ‘Lingua Madre’, dedicât aes feminis migrantis (o di origjin foreste) residentis in Italie. Il concors leterari al è un progjet permanent de Regjon Piemont e dal Salon dal libri di Turin, nassût intal 2005, cul patrocini dal Ministeri de Culture e de Comission Europeane. La premiazion dal decim otâf concors nazionâl e je previodude par lunis ai 22 di Mai al Lingotto di Turin. Natalia Bondarenko e je stade sielte parcè che e pant cun eficacie teribile la posizion impussibile di une femine devant de vuere e il sens di inadeguatece che o podìn sintî intun mont dividût dal odi. (A.I.) – 05.04.2023