Premi leterari di Tisane: ducj a vuelin jentrâ inte jurie

Il Premi Leterari Internazionâl “Latisana per il Nord-Est” al à passât i confins regjonâi, segnant il record di domandis par fâ part de jurie dai letôrs, ben 57, rivadis no dome dal Friûl-Vignesie Julie e dal Venit, ma ancje di Lazi, Sicilie e Paîs Bas. I nûf components de jurie a son stâts tirâts fûr in direte Facebook e a varan a cjase i cinc titui selezionâts de jurie tecniche. A varan timp fint ai 24 di Fevrâr par comunicâ ae segretarie dal Premi, traviers il sît, la proprie preference. Il libri plui votât al cjaparà il Premi Coop Alleanza 3.0. La jurie dai fantats, la novitât de edizion 2024, e je componude invezit di nûf students che a vegnin dal ISIS “Mattei” di Tisane e che a assegnaran il Premi “Banca360FVG”. Par cognossi invezit il vincidôr dal Premi Narative 2024, l’apontament al è ai 13 di Avrîl dal 2024 li dal Teatri Odeon di Tisane. (A.I.) – 14.12.2023