Sottsass al cine te galarie di Gardiscje

A van indevant ae Galarie Spazzapan di Gardiscje i avigniments colaterâi de mostre “Sottsass/Spazzapan”, dedicade ai rapuarts e ai confronts tra il pitôr e architet trentin e l’artist nassût a Gardiscje. Il cuart apontament si tignarà miercus ai 5, aes 6 dal dopomisdì, inte Galarie. Il storic dal cine Daniele Terzoli e Vanja Strukelj, co-curadore de mostre, a introdusaran la proiezion dal documentari “Il treno di Sottsass” di Valeria Parisi, une des tantis rileturis pussibilis de figure dal artist, a dîs agns de muart e intal centenari de sô nassite. Prime dal incuintri, une visite vuidade introdutive cui curadôrs de mostre. (A.I.) – 04.04.2023