Storiis di edilizie in Friûl

Inte suaze de rassegne “L’edilizia messa in righe”, promovude de ANCE Udin e de Associazion culturâl Archimede e Domenico Taverna, joibe ai 18 aes 5 dopomisdì inte Torate di Sante Marie di Confindustria Udin si tignarà la presentazion dal libri “Opere che restano” (Oparis che a restin), storiis di edilizie in Friûl, di Sabrina Tonutti. La publicazion si propon tant che un viaç ae scuvierte des impresis che a àn lassât une olme indelebile inte edilizie furlane. Traviers lis testemoneancis dai artesans locâi – muredôrs, fornasârs, mosaiciscj e pichepieris – e conte lis storiis di chei che a àn contribuît ae costruzion di edificis e infrastruturis, veris oparis di inzen destinadis a durâ a dilunc. (A.I.) – 17.04.2024