Sucès di public pai Mosaics de scuele di Spilimberc

Domenie ai 27 di Avost si è sierade la mostre “Mosaico&Mosaici”, l’avigniment estîf anuâl de Scuele dai Mosaiciscj dal Friûl di Spilimberc, screât propit un mês indaûr. Vierte par dut Avost, e à vût ogni dì un grant flus di visitadôrs e cumò, fasint i conts, si pues afermâ che la mostre e je stade un sucès. Plui di sîs mil di fat a son stâts i acès: visitadôrs rivâts te Scuele di bessôi o in grup, no dome de regjon, ma di dute Italie e ancje dal forest. La Scuele Mosaiciscj dal Friûl si riconferme duncje un pôl di atrazion pal turisim internazionâl, par esperts, ma ancje curiôs e par cui che i plâs la art e che dispès, acompagnâts ancje de famee o di amîs, si son fermâts a lunc intes salis espositivis de Scuele. (A.I.) – 29.08.2023