Si è sierade domenie ai 28 di Avrîl cuntun belanç plui che positîf la cuarte cunvigne internazionâl dal Centri Studis Langobarts dal titul “Grimoalt. Dal ducât furlan al ream”, promovût de Fondazion de Claricini Dornpacher, dal Comun di Cividât e de Deputazion di Storie Patrie pal Friûl. Lis cinc zornadis di studi dedicadis al sovran che par prin al à metût adun intun unic ream dutis lis tieris langobardis, di Nord a Sud de penisule, a àn puartât a Cividât e a Vile de Claricini Dornpacher a Butinins di Muimans passe setante studiôs de Italie e di Paîs forescj, ancje dai Stâts Unîts, tra i plui grancj specialiscj de materie, e plui di 800 docents e students dal Friûl-Vignesie Julie, ma ancje di Lombardie, Venit e altris regjons. La inaugurazion invezit e à riclamât cetantis personalitâts dal mont politic e culturâl. “O sin une vore sodisfats di vê puartât in Friûl un moment impuartant di studi dedicât ae storie langobarde, che e à lidrîs inte nestre regjon – al sotlinee Oldino Cernoia, President de Fondazion –. L’incuintri dai massims studiôs de materie e puartarà tal avignî ae creazion di une rêt di relazions buine par altris iniziativis. Il nestri auguri al è che la Fondazion e sedi un pont di riferiment impuartant inte Regjon pai studis medievâi e in particolâr pe civiltât langobarde”. (A.I.) – 29.04.2024
Foto Petrussi
