Tiepolo viodût cui voi dal artist di frut

Dodis citâts, cuatri regjons, passe vincj events e sîs itineraris di fâ a pîts o in biciclete par celebrâ il gjeni de piture dal Sietcent. In ocasion dal complean di Giambattista Tiepolo (nassût a Vignesie ai 5 di Març dal 1696), e torne pe cuarte edizion la manifestazion “I lûcs dal Tiepolo in fieste”, dedicade al artist e ae ereditât puartade indevant dai fîs Giandomenico e Lorenzo. Ancje Udin e je stade sielte e il prin apontament al è miercus ai 5 di Març tal palaç Mantica, sede de Filologjiche. Al sarà presentât un gnûf libri ilustrât di Barbara Jelenkovich, “Giandomenico sogna”, che al conte la Udin dal Sietcent, chê dai Tiepolo pari e fi. Te conte, Giandomenico al è ancjemò frut e si insumie di deventâ un grant artist. Ai fruts e aes lôr fameis e je dedicade la visite speciâl di sabide ai 8, cuant che si podarà fâ un viaç par fameis dentri dai trê lûcs cun oparis dai Tiepolo in citât (il Museu diocesan e lis galariis, il Domo e l’Oratori de puritât), cjalant i cuadris propit cui voi dal piçul Giandomenico Tiepolo. (A.I.) – 04.03.2025