Al è stât presentât il progjet di ricercje sociolinguistiche realizât di Ires F-Vg Impresa Sociale cul contribût de Arlef.
“Tire fûr la lenghe”, che al tacarâ ai 8 di Març, al previôt la difusion e la racuelte sul teritori regjonâl di passe 3.000 cuistionaris di ricercje prontâts di une scuadre di ricercjadôrs e di un comitât sientific di linguiscj, in colaborazion cul Fef Forskningscentrum för Europeisk Flerspråkighet. Si cjaparà dentri un campion controlât di personis cun caratars demografics specifics che a podaran jemplâ il cuistionari intune des lenghis feveladis in regjon: talian, furlan, sloven e todesc.
L’obietîf al è capî cuâl che al è il stât di salût dal furlan e garantî un confront cu lis ricercjis precedentis. Cun di plui, si analizaran lis preferencis di ûs des lenghis intes diviersis situazions de vite di ogni dì e tai strâts de popolazion. I dâts inzornâts a permetaran di fissâ lis azions di meti in cjamp tal avignî. (A.D.G.) – 07.03.2023
