Trê dîs di misteri tal paîs dai curtìs

Il paîs dai curtìs al devente ancje une capitâl dal misteri e dal zâl te leterature, tal cine e no dome, di vinars ai 15 a domenie ai 17 di Novembar cun “Lama e Trama – Incontri nel giallo”, un event leât ae tipiche produzion di Manià. Un progjet culturâl che al è tacât tal 2003 cuntun concors leterari che dai 2012 al è dome pai students des scuelis, che a podaran scrivi lis lôr contis fint ai 12 di Zenâr dal 2025. Dîs, invezit, a son i apontaments in program in diviers lûcs di Manià, cun autôrs di libris zâi – soredut pai zovins, ma no dome – e di fumets, une visite speciâl al Museu de farie dai curtìs e cetancj altris events leâts a Diabolik, l’innomenât personaç dal fumet talian, che al dopre propit un curtìs! Inmaneât de associazion Thesis, par cure di Emanuela Furlan, al varà ospits il dissegnadôr Onofrio Catacchio, l’autôr Domenico Wanderlingh, il gjornalist Stefano Nappi e il seneggiatôr Andrea Carlo Cappi. In program ancje une cene ‘criminâl’ e une schirie di dialics sui ‘classics’ e i personaçs di vuê dal misteri. (A.I.) – 14.11.2024