Trê dîs di sience par ducj a Udin

E sarà dedicade aes scuelis la viertidure dal festival “Collega-menti”, inmaneât de Universitât dal Friûl, cu la poie di PromoTurismoFVG e dal Comun di Udin, che si fasarà di vinars ai 4 a domenie ai 6 di Otubar in diviers lûcs dal centri de capitâl furlane. L’innomenât fisic e divulgadôr Vincenzo Schettini al vierzarà il festival aes 9.30 di buinore tal Teatri “Giovanni da Udine” cun “La fisiche che e plâs”, une conference che e à il stes titul dal so libri che al à vendût cuasi 100 mil copiis. Dopomisdì, a son in program doi laboratoris e trê avigniments vierts al public, par permeti ai citadins di dialogâ cui ricercjadôrs. Trasformant cussì la capitâl furlane intun spazi dulà cjalâ, scoltâ e fâ esperiments, tocjant cun man i diviers gjenars di “inteligjencis”: il teme dal festival, che al sarà analizât ancje intai incuintris in program sot de Loze dal Lionello. Vinars ai 4 a vierzaran ancje lis cuatri esposizions preparadis pes zornadis dal festival tal palaç Morpurgo e devant dal ex cine Puccini. (A.I.) – 02.10.2024