Trê dîs par fevelâ di Vuere frede

“Citâts dividudis e citâts contindudis intai agns de Vuere frede” al è il teme de tierce edizion dal Forum internazionâl in program di joibe ai 20 a sabide ai 22 a Gurize, par iniziative de Universitât dai Studis dal Friûl cu la Universitât di Harvard, par cure de associazion Friuli Storia, pe direzion sientifiche dal storic Tommaso Piffer. Dopo la edizion 2023 sul teme “Confins e tieris di confin inte Vuere frede” e chê dal 2024 dedicade ae “Memorie e ai museus de Vuere frede”, tai trê dîs di chest an si frontarà un teme colegât in maniere direte al an de Capitâl europeane de Culture che e met adun in chescj mês lis citâts di Gurize e Gnove Gurize, separadis in sens storic de Coltrine di fier, cumò adun intal an di GO!2025. A son cuarante lis grandis vôs internazionâls che a rivaran a Gurize, storics e analiscj di dut il mont, che a metaran pe prime volte a confront la storie des tantis citâts che a son stadis dividudis o contindudis dilunc de Vuere frede, in Europe e su dute la Tiere. (A.I.) – 19.03.2025