Trê dîs tal spirt di Hemingway

Di joibe ai 27 a sabide ai 29 di Jugn, Lignan e torne capitâl de leterature internazionâl in graciis dal premi leât al autôr american che le à fate deventâ innomenade in dut il mont cul non di “piçule Florida”, propit 70 agns indaûr: Ernest Hemingway. La cuarantesime edizion dal Premio Hemingway e sarà celebrade sabide di sere li dal Cinecity, cu la cerimonie di premiazion presentade di Giulia Presutti (Rai3 Report), daspò di une schirie di incuintris, cunvignis e riflessions propit cui premiâts e altris ospits: ancje il nevôt John Hemingway. I premis a son lâts al scritôr cilen Benjamin Labatut pe leterature, inte sezion “Testemoni dal nestri timp” a Irina Ščerbakova, Premi Nobel pe pâs tal 2022, al innomenât psichiatri talian Vittorino Andreoli pe sezion “Aventure dal pinsîr” e al urbanist Francesco Finotto pe fotografie. Al fisic Vincenzo Schettini il premi speciâl “Lignan pal avignî” pe capacitât di fevelâ cui zovins. (A.I.) – 26.06.2024