Ultins dîs pe mostre dai Tre Allegri Ragazzi Morti

Un avigniment speciâl, za dut plen, par sierâ la mostre “Tre Allegri Ragazzi Morti EXPO” tal Palaç dal Fumet di Pordenon. Domenie ai 9, il grup pordenonês al sunarà, intes salis espositivis de Galarie “Pizzinato”, intun conciert dal vîf che al ripasse i trente agns di cariere e che al fisse la conclusion degne e spetacolâr de esposizion che nus à acompagnât par cuatri mês. La ultime fin de setemane de mostre e ufrìs ai visitadôrs ancje la oportunitât di lâ daûr di visitis vuidadis speciâls, compagnadis di Enrico Sist, passionât di fumet e di culture pop. Sabide ai 8 e domenie ai 9, des 11 di matine, Sist al propon la sô vision dal Mont dai Tre Allegri Ragazzi Morti di une prospetive inedite, tra art, fumet, sunôrs e visions, intun viaç che al va di là de musiche. (A.I.) – 07.03.2025