Un festival tal borc plui isolât de Italie

L’an passât il progjet al jere nassût par scomesse: chê di puartâ, a pît, artiscj, musiciscj e public tal “borc plui isolât de Italie”, une piçule frazion vuê disabitade tal comun di Mueç, acessibile dome cuntune cjaminade di une orute. “Isola di Stavoli”, la rassegne inmaneade de associazion Uponadream, e torne dai 13 ai 16 di Jugn cun cuatri dîs di imersion totâl intun palc naturâl che al darà acet a spetacui di art, musiche e teatri, clamant artiscj e atôrs di dute Italie. Deventât no dome un simbul, ma ancje il pont di cunvigne par cui che al à dibisugne di disintosseâsi dai spazis de citâts, cirint di tornâ a conetisi cul ambient, l’apontament al conserve la sô carateristiche: puartâ spetacui vêrs intun puest unic de mont, li che ogni ativitât si davuelç in sintonie cul lûc. I nons confermâts a son chei dal sunadôr di armoniche Paolo Forte, il cuintet Green Waves e il tercet Treeorganico, il spetacul di Mattia Cason “Sui sentieri per l’Europa”, chel di Manuel Buttus intitulât “È un mondo difficile”, la cubie di balarinis ESENCO Dance Movement, il cjantautôr cjargnel Alvise Nodale, cetancj artiscj sot dai 35 agns e une schirie di ativitâts e laboratoris al viert pal public. (A.I.) – 12.06.2024