Un fat storic che al rive dal Friûl si podarà cognossi a nivel di dut il Stât talian e no dome, graciis a une coproduzion ARLeF e Arte Video. “Marcho. L’ultima bandiera”, in onde ai 31 di Otubar dal 2024, su Rai Storia (canâl 54 dt), te suaze de trasmission “5000 anni e più. La lunga storia dell’umanità”, al puartarà tes cjasis dai telespetatôrs di dute la Italie une storie restade platade par 500 agns e scuvierte tal passât plui resint, tal 1986, intant des voris di restaur, graciis a une letare cjatade fra lis pagjinis di un libri conservât suntune scansie de residence fortificade La Brunelde di Feagne. La storie e je chê di Marc di Murùs, l’ultin puartebandiere dal Stât patriarcjâl di Aquilee, l’unic nobil che i à dât cuintri ae invasion di Vignesie, tor il 1420.
La gnove e je rivade in ocasion di une conference stampe inte sede di Udin de Regjon Autonome Friûl-Vignesie Julie, là che a àn partecipât Pierpaolo Roberti, assessôr regjonâl aes Autonomiis locâls; Giorgio Zanchini, condutôr de trasmission Rai Storia là che al sarà programât il film; Eros Cisilino, president de ARLeF – Agjenzie regjonâl pe lenghe furlane; William Cisilino, diretôr de ARLeF; Claudio Zorzenon, aministradôr delegât di Arte Video; e Marco Fabbro, il regjist.
La produzion ARLeF e Arte Video, realizade cul contribût de Friuli Venezia Giulia Film Commission e dal Fonts pal audiovisîf dal Friûl-Vignesie Julie, e je di rimarc pe precision metude te ricercje filologjiche di ogni detai, dai costums ai lûcs, passant pal contest storic. Elements che a àn produsût une opare di grande cualitât ancje in graciis dai aprofondiments storics dal prof. Franco Cardini, muse cognossude tal piçul schermi, medievalist di innomine e sagjist prolific, e di Alberto Travain, autôr e curadôr di variis saçs su la figure di Marc; Flavia Maria De Vitt, docente di Storie medievâl ae Universitât dal Friûl; William Cisilino, diretôr de ARLeF; Gianfranco Ellero, autôr di cetantis monografiis e saçs su la storie dal Friûl.
Protagonist de pelicule al è Paolo Mutti, straordenari tal rûl di Marc, dongje di lui Aida Talliente tal rûl de femine Catarine Arcoloniane, Fabiano Fantini, che al interprete Pileu, pari di Marc, Alessandro Mistichelli tal rûl di Riçart Darcjan, Lorenzo Acquaviva tal rûl dal dôs Mocenigo e Paolo Fagiolo in chel dal Cjapitani venezian.
L’assessôr regjonâl aes autonomiis locâls, Pierpaolo Roberti, che nol à podût jessi presint, al è intervignût cuntun video, là che al à ricuardât la ricjece storiche dal Friûl e al à marcât cemût che “chest docufilm al rapresente un altri toc impuartant de nestre storie, chê cul “s” maiuscul, chê che e je buine di creâ spirt e identitât di un popul e in chest câs di une Regjon impuartante come il Friûl-Vignesie Julie. Duncje us ai agrât par cheste iniziative, che no dome e promôf la lenghe furlane – come che al è just, e za chest al è un fat di laudâ – ma ancje parcè che e conte lis lidrîs di une regjon misclice, risultât di esperiencis diferentis, cun particolaritâts identitariis diviersis: une di chestis, fondamentâl e cetant impuartante pal nestri teritori, e je propit chê contade in chest docufilm”. (a.d.g.) – 01.11.2024
