Un libri de “Treccani” pal festival “Dedica”

A pôc plui di un mês de conclusion a Pordenon de trentesime edizion dal festival “Dedica”, il percors des iniziativis par celebrâ i 30 agns de manifestazion de associazion Thesis si inricjìs di une novitât impuartante: la prestigjose Treccani e publiche di fat un libri “dedicât a Dedica”, za in librarie di cualchi dì. Firmât dal curadôr dal festival Claudio Cattaruzza, publicât pe golaine Treccani Libris/Visioni, intitulât “Letteratura nei tempi inquieti. Scrivere, immaginare, cambiare il mondo” (Leterature intai timps incuiets. Scrivi, imagjinâ, cambiâ il mont), al sarà presentât in anteprime taliane joibe ai 2 a Rome,  inte sale Igea dal palaç de Enciclopedie Taliane, la sede prestigjose de Treccani. Ospit di onôr e sarà la scritore Dacia Maraini, protagoniste di Dedica inte edizion dal 2000. Il libri al racuei une sielte des testemoneancis fatis di cualchi autôr tirât dentri intai agns dal festival, valorizant lis monografiis che a son stadis fatis par ogni edizion. (A.I.) – 30.04.2024