Un… mâr di events a Staranzan

Intal Comun di Staranzan – jenfri mâr, flum e lagune – al va indevant fint a domenie ai 14 il “Festival dell’acqua”, nassût di une idee dal scritôr Roberto Covaz. Une manifestazion multidissiplinâr che e vûl stimolâ une rinovade cussience su chest ben de umanitât in vie di rarefazion e stiçâ compuartaments sostignibii. Intal segn de interazion tra sience e art, la rassegne e ufrìs trente apontaments tra cunvignis sientifichis, percors di ricercje, laboratoris e avigniments espositîfs, escursions e incuintris leteraris. Il calendari al cjape dentri sabide ancje il conciert dal innomenât pianist jazz Danilo Rea, grancj atôrs (Giobbe Covatta, Gabriele Vacis…) e Luca Mercalli, President de Societât meteorologjiche taliane. (A.I.) – 11.05.2023