Un mosaic di Spilimberc pal “Interreg GO!”

Un mosaic realizât de Scuele Mosaiciscj dal Friûl di Spilimberc al è deventât il simbul dal “Interreg GO!”, l’avigniment dedicât ai programs Interreg de Union Europeane, che chest an si è fat inte prime Capitâl Europeane de Culture Cence confins: Gnove Gurize e Gurize. Il mosaic al à fat di suaze al moment conclusîf dal event anuâl dal Interreg, cuant che intal Plaçâl de Transalpine, che sul teritori regjonâl al rapresente la union tra Stâts europeans, i sindics di Gurize, Gnove Gurize e Šempeter-Vrtojba a àn puartât i lôr auguris pal futûr di cooperazion. Il president de Scuele Mosaiciscj, Stefano Lovisoni, al à sclarît al public internazionâl che l’istitût, cui siei arlêfs che a vegnin di puescj diviers dal mont (plui di une ventine, vie pai ultins agns), al è un esempli di integrazion e di scambi tra personis cun culturis diviersis. (A.I.) – 14.04.2025