Un museu di Gurize al domande un jutori ai citadins par un restaur

La fondazion di Palazzo Coronini Cronberg di Gurize e domande ai citadins e al so public un jutori cuntune racuelte di fonts in rêt. Il progjet “Il Fortepiano dei Conti”, zontât sul portâl Artsupp.com, une plateforme cun plui di nûfcent istituzions culturâls su dut il teritori nazionâl, si propon di restaurâ un râr strument de colezion Coronini e di tornâ a metilu intal percors di visite. Il Fortepiano, difondût inte ultime part dal Sietcent e precursôr dal piano moderni, al prodûs sunôrs midiant cuardis batudis di martieluts rivistîts di piel impen che di feltri. La Fondazion e à metût a disposizion vantaçs specifics, ideâts ad hoc, par dî graciis ai sostignidôrs dal progjet. (A.I.) – 20.06.2022