Un plen di culture pai 3 di Avrîl a Sacîl

A Sacîl, tal percors che al puartarà fint aes celebrazions ai 6 di Avrîl, e je in program ancje une serie di events colaterâi. Joibe ai 3 di Avrîl, tal Salon des Fiestis di Palaç Ragazzoni, aes 6 di dopomisdì, si fasarà la conference “I antîcs Statûts di Sacîl”, cun Ludovico Mazzarolli de Universitât dal Friûl e i ricercjadôrs Stefania Miotto e Alessandro Fadelli. I “Statuta Comunis Sacili” a certifichin la grande autonomie e la struture aministrative elaborade che a àn favorît l’impuartant disvilup economic e culturâl de citât vie pe Ete di Mieç tarde. Vinars ai 4 tal Palaç Ragazzoni si screarà la mostre “Stralûs. 1985-2025 Arte in Friuli / Art in Friûl”: un “viaç” che al ufrìs une panoramiche su la ricjece e la diversitât de art furlane, midiant des oparis di vot artiscj diferents. In chê stesse zornade, simpri tal Salon des Fiestis di Palaç Ragazzoni, aes 8.45 sot sere, al larà in sene “Poesiis di confin: tra Friûl e Venit, tra îr e vuê”, rimis sparniçadis di G. Battista Donato, leterât dal Cinccent, e Fabio Franzin, poete di vuê, interpretadis di Caterina Comingio e Serena Ervas. Sabide ai 5 di Avrîl, invezit, te place de glesie di Sant Uldarì, aes 3.30 di dopomisdì si fasarà “Sacîl e la Patrie dal Friûl”, un laboratori creatîf par fruts cu la associazion Playground APS. (A.I.) – 02.04.2025