Kader Abdolah, pseudonim dal scritôr iranian olandês Hossein Sadjadi Ghaemmaghami Farahani, une vôs impuartante de leterature internazionâl, cognossude pal so impegn a pro de libertât di espression e pal dialic fra lis culturis, al sarà l’autôr protagonist de trentesime prime edizion dal festival “Dedica”, a Pordenon dai 15 ai 22 di Març dal 2025. Inmaneât de associazion culturâl Thesis e sostignût de Regjon, dal Comun di Pordenon, de Fondazion Friuli e di cualchi realtât privade, il festival al ufrirà al public une imersion uniche inte poetiche di un scritôr bon di unî cun delicatece Orient e Ocident traviers lis pagjinis dai siei libris. Un scritôr che al à daûr une vite segnade dal esili e de impussibilitât di tornâ intal so Paîs, l’Iran, dulà che al è nassût intal 1954. (A.I.) – 19.11.2024
Foto di B. Cannarsa
