Une librarie digjitâl ufierte de Filologjiche

Za di agns la Societât Filologjiche Furlane e puarte indevant un lavôr di digjitalizazion par podê meti a disposizion dai studiôs e di ducj i interessâts simpri plui materiâi che a rivuardin la storie, la lenghe e la culture dal Friûl. Cetantis risorsis digjitâls a son za a disposizion in rêt, di lei o di discjamâ. In particolâr, tal catalic da la biblioteche in linie – a la direzion opac.filologicafriulana.it – e je stade realizade la “librarie digjitâl”, une vetrine li che si cjatin cun facilitât e si puedin discjamâ in maniere libare, in formât pdf, cetantis publicazions furlanis. I titui a son dividûts par argoments: lenghe furlane, toponomastiche e onomastiche, storie, personis, glesie furlane, fonts pe storie dal Friûl e culture furlane. I volums a disposizion a son chei publicâts da lis istituzions plui impuartantis che sul nestri teritori a lavorin su la culture furlane e a àn partecipât al progjet in rêt “Identitât Culturâl dal Friûl”. (A.I.) – 27.07.2022