Une messe cjantade par memoreâ la muart di Tiepolo

Apontament speciâl pai “Tiepolo Days”, lis zornadis de Vierte dedicadis ae famee di artiscj venits, che a àn lassât cetantis olmis a Udin. Un progjet di ricercje e di divulgazion sui Tiepolo pari e fi e sul Sietcent in Europe. Joibe ai 27 aes 7 sot sere, intal Oratori de Puritât in place Domo, e sarà proponude une Sante Messe in onôr de Beade Vergjine Marie, intal ricuart di Giambattista Tiepolo, compagnade des musichis sacris dal Sietcent par orghin e sopran. L’artist al è muart propit ai 27 di Març dal 1770 a Madrid, cence podê plui tornâ inte sô citât, Vignesie. In sieradure de Messe e sarà proponude une visite vuidade al Oratori de Beade Vergjine de Puritât. (A.I.) – 26.03.2025