Une opare di Ceschia donade ae Universitât

Une opare dal artist tarcintin Luciano Ceschia (1926-1991) e je stade donade ae Universitât dal Friûl de femine dal pitôr e scultôr, Roberta Tessaro, e de fie Valentina Ceschia. Al è un dissen di 72×102 cm, cence titul, fat intal 1956 cun chine e pastei colorâts, che al rivuarde il sogjet “Cjavai e cavalîrs”. L’at di donazion al è stât sotscrit a Palaç Antonini Maseri ae presince des donadoris, dal retôr Roberto Pinton e dal president de Comission pal patrimoni artistic de Universitât, Alessandro Dal Puppo. La colezion di art dal Ateneu – cu lis oparis za catalogadis in rêt sul sît https://arte.uniud.it/ – si slargje a pro di dute la comunitât academiche, viodût che il dissen di Ceschia al sarà colocât inte sale studi di Palaç Antonini. (A.I.) – 18.03.2024