Une serade di flabis persianis par preparâsi a “Dedica”

Il viaç di “Anteprima Dedica”, une imersion intun univiers fat di musiche, narazion e leterature, lant daûr des sugjestions de opare dal scritôr iranian olandês Kader Abdolah, che tal mês di Març al sarà protagonist dal festival a Pordenon, al va indevant miercus ai 26 a Fontanefrede. In biblioteche aes 8.45 sot sere al è previodût “Persia Fantastica”, un incuintri di leturis in musiche gjavadis fûr di “Calila e Dimna” di Kader Abdolah, un dai libris persians antîcs plui impuartants. Protagoniscj a saran la atore e cjantante Monica Mosolo e il polistrumentist Leo Virgili, par un viaç intal mont esotic di un Orient là che si messedin tradizions indianis, persianis e arabis. (A.I.) – 25.02.2025