E rive chest an ae edizion numar 10 la Setemane de Culture furlane, la rassegne di iniziativis culturâls inmaneade de Societât Filologjiche Furlane, che chest an si le fâs dai 18 ai 28 di Mai, cuntun program une vore siôr che al cjape dentri 200 events.
La rassegne e je nassude tal 2014 e e je cressude an par an, simpri cun chê di fâ cognossi miôr la realtât de nestre regjon, la sô storie, la sô tradizion e la sô identitât. «Proprit “identitât” – al motive il President de Societât Federico Vicario – e je la peraule che plui di dutis e rive a segnâ i percors che nus puartin a capî il sens dal nestri jessi comunitât; la identitât e misure la combinazion di fats, di vicendis e di situazions che a àn rindût e che a continuin a rindi il Friûl ce che al è e nô furlans ce che o sin, cu lis buinis resons di ricognossi une particolâr vision dal mont e de vite che nus aparten».
A son stâts dîs agns di lavôr che – al va indevant il President – nus àn fat condividi un progjet cul teritori e consolidâ une rêt di relazions simpri plui largje e fuarte, stant che nol baste plui il “fasìn di bessôi”, ma o vin di dâsi adun par fâ cressi la cussience e la cognossince dal patrimoni materiâl e imateriâl de nestre tiere». Lu dimostrin i numars de edizion 2023, che e viôt la colaborazion di passe 70 Comuns, 20 scuelis e istitûts comprensîfs, 180 associazions, centris culturâi, museus e ecomuseus, parochiis, pro loco, grups corâi e compagniis teatrâls.
La rassegne e à il patrocini dal Ministeri de Culture, de Regjon Autonome Friûl-Vignesie Julie e dal Consei regjonâl. Cun di plui, a poin la Setemane la Fondazion Friuli e la Fondazion Casse di Sparagn di Gurize. E va indevant ancje la colaborazion cul Ent Friûl tal Mont par slargjâ la dimension de Setemane a nivel globâl e rivâ ai “Fogolârs furlans” sparniçâts ator pal mont. Ancje par chest il sît internet www.setemane.it al à une grafiche gnove par tindi inmò plui biel e facil cjalâ i events che si puedin viodi in linie in direte streaming; cun di plui il sît al cjape dentri in detai il program di dutis lis manifestazions.
Cetantis iniziativis a ricuardaran personaçs benemerits che a àn fat tant pal Friûl: studiôs e leterâts, artiscj e inteletuâi; tra chescj Durì di Pordenon, Giovan Battista Donato, Tiziano Tessitori, Carlo Luigi Bozzi, Anna Bombig, Otto D’Angelo, Sergio Maldini, Giuseppe Bugatto e inmò di altris.
Il centenari de muart dal compositôr Arturo Zardini (1869-1923) al sarà il cûr di cheste edizion, cun tancj concierts e incuintris: a Pontebe, li che al nassè, sabide ai 20 di Mai aes 8 e mieze di sere inte Plêf di Sante Marie Maiôr il grop di otons Brassevonde e l’atôr Massimo Somaglino a presentaran i tocs plui innomenâts dal repertori dal mestri tal conciert “Un salût ’e furlanie”; un altri conciert, “In-cjant il Friûl”, si fasarà invezit te Glesie di S. Spirt cja de Badie di Mueç vinars ai 26 simpri aes 8 e mieze di sere cu la partecipazion dai grops corâi “Zanon Amico” di Udin “Giuseppe Peresson” di Darte e “Zahre” di Sauris. Martars ai 23 di Mai aes 6 sore sere inte Sale Corgnali a Udin al sarà invezit l’incuintri “Arturo Zardini e i suoi canti friulani tra innovazione e tradizione” cun Franco Colussi e Roberto Frisano e la partecipazion dal nevôt di Zardini, Giuliano Rui. Di altris iniziativis a son in program par miercus ai 24 di Mai aes 17.30 li de sede Ute Paolo Naliato di Udin a Padier (incuintri e conciert “Je tornade primevere”) e sabide 20 aes 20.30 tal bociodrom di Pagnà (spetacul “A racuei o voi lis stelis”).
Lis manifestazions – des cunvignis e conferencis aes presentazions di libris, visitis vuidadis, spetacui e concierts – si fasin in dut il teritori de regjons. O ricuardìn, tra lis tantis, l’incuintri di presentazion dal fonts fotografic “Oreste Bugni”, martars ai 23 di Mai aes 20.30 tal Centri Civic di Lucinîs: un patrimoni di cuasi 600 fotografiis fatis dilunc de prime vuere mondiâl, tra il 1915 e il 1919, e di chescj 340 imagjinis a contin i fats di vuere che si son davuelts tal Gurizan. La Societât Filologjiche e à volût valorizâchest fonts cu la catalogazion e la metude in linie.
Tal Friûl di soreli a mont o ricuardìn invezit in particolâr il spetacul di Carlo Tolazzi “L’uovo del cucùlo” cun Marianna Fernetich e Federico Scridel tal auditorium comunâl di Çopule vinars ai 26 di Mai aes 20.45: un at unic par fânus cognossi la tragjedie dai “fîs dal nemì”, i fruts nassûts par colpe des violencis dai soldâts austrongjarês su lis feminis furlanis dopo de bataie di Cjaurêt; par chei fruts pre Celso Costantini, che al jere nassût propit a Çopule, al veve metût sù a Puart un orfanotrofi che al dave acet a fintremai 350 fruts.
In Cjargne un apontament pardabon impuartant al sarà vinars ai 19 di Mai aes 8 di sere inte Plêf di Guart: il conciert “Da font de mê anime. Cjants di glesie a la vecje in ricuart di pre ’Sef Cjargnel”, un incuintri musicâl des cjantoriis che a son ancjemò in ativitât tes glesiis de Cjargne (Compagnie di Çurçuvint, cjantôrs di Rigulât, For Davôtri, Gjiviane, Cjaçâs, Guart, Dieç) in ricuart di pre ’Sef Cjargnel (1940-2017), che cun passion si è impegnât a pro de ricercje e par mantignî vîf il repertori liturgjic furlan tradizionâl; al introdûs pre Loris Della Pietra e a intervegnin i curadôrs de iniziative, Roberto Frisano e Novella Del Fabbro.
Pes cunvignis o ricuardìn l’apontament cui archivis e chest an si fevelarà di archivis etnografics audio e video tal cors de cunvigne “Sguardi e voci della memoria” in program vinars ai 19 di Mai aes 16.30 in Palaç Mantica a Udine e in direte streaming su www.setemane.it
Palaç Mantica, sede di Udin de Societât Filologjiche, al da acet a cetancj apontaments e, te “cjanive” di vie Manin 18/a, acnje ae mostre fotografiche di Diego Cinello “Friûl – valadis alpinis, monts, aghis, ints, une conte a mieç di imagjinis des maraveis gjeografichis e naturalistichis dal nestri Friûl che si podarà viodi fin ai 11 di Jugn.
A son cetantis ancje lis rassegnis di events che si misclicin cu la “Setemane” e che a previodin events in colaborazion; Mulini aperti in Carnia (20-21 di Mai), la zornade nazionâl ADSI (21 di Mai), il festival des filandis a Dignan (26-28 di Mai), lis cjaminadis Passiparole in Friuli di soreli a mont, il festival èStoria a Gurize, Sapori Pro Loco a Vile Manin di Passarian.
La ultime zornade, domenie ai 28 di Mai, e sarà come par tradizion la Fraie de Vierte, la fieste di primevere de Filologjiche che chest an si le fâs a Prepot. Si presentarà il numar speciâl de riviste “Sot la Nape” dedicât al teritori e il volum “Cultura in Friuli” che al cjape dentri i ats de Setemane dal an passât. La gnove di chest an e je la Fraie dai fruts, une zornade pai fruts des scuelis de infanzie e primarie di Prepot, che a fasaran fieste ancje lôr, cul teatri par furlan di Gianluca Valoppi e Michele Zamparin (Teatro Positivo) e cul laboratori di musiche par cure di Giorgio Parisi. La iniziative e je dentri de “Setemane pai fruts”, une schirie di leturis animadis, presentazions di libris e ativitâts par furlan pai plui piçui, in colaborazion cun cetancj Comuns e Bibliotechis.
Par sierâ la Setemane, la sere aes 8 e mieze tal solon di palaç Mantica a Udin e sarà la anteprime de leture Noterelle / Storiis di Graziadio Isaia Ascoli cul Teatro Incerto, che e presente la vicende umane e dai studis di Graziadio Isaia Ascoli (1829 – 1907), lenghist di nivel internazionâl che la Filologjiche i è intitulade, autôr dai innomenâts “Saggi Ladini” publicâts tal 1873, là che pe prime volte e ven descrite la identitât e la specificitât de lenghe furlane. (A.D.G.) – 16.05.2023
