“Leams di artist” al è il titul des dôs iniziativis culturâls organizadis dal Assessorât ae Culture di Cividât cun Arteventi par celebrâ S. Valantin intai museus. Vinars ai 14 aes 5 dopomisdì, i visitadôrs a podaran lassâsi vuidâ intun viaç tra lis oparis di art esponudis tal Palaç de Nordis – Colezion de famee De Martiis, ae scuvierte dai leams profonts che a àn unît i artiscj: soredut lis lôr storiis di amôr, di amicizie e di colaborazion, tant che ocasion par palesâ la part umane che si cjate daûr di oparis mestris di no podê dismenteâ. Sabide ai 15 aes 4 dal dopomisdì, invezit, inte atmosfere magjiche dal Munistîr di Sante Marie in Val e je previodude “Amôr sacri, vin profan”, une conte sugjestive che e pant i segrets di amôr dentri e fûr lis muris dal Munistîr, cu la pussibilitât di cerçâ i vins de aziende agricule La Cricca. (A.I.) – 13.02.2025
Foto Petrussi
