Vicino/lontano al torne a ocupâsi ancje de mont

Al torne ancje chest Istât “vicino/lontano mont”, la rassegne itinerante di “vicino/lontano” dedicade ae mont. La tierce edizion, simpri curade di Claudio Pellizzari, e tacarà ai 19 di Lui a Udin e si siererà ai 23 di Setembar a Dordole, tocjant diviersis localitâts de mont furlane, dulà che a saran proponûts moments di riflession e intratigniment sui temis de mont e de sô int. Une anteprime impuartante, in forme di cunvigne, e je in program vinars ai 30 aes 4 dopomisdì ae Comunità Nove, al Parc di S. Svualt di Udin: “I margini al centro. Confronto sulle povertà educative” al è l’argoment che al viôt il confront tra il sociolic Giovanni Carrosio e Andrea Morniroli dal Forum Disuguaglianze Diversità, cu la partecipazion di Federico Pirone, assessôr ae Culture di Udin. (A.I.) – 29.06.2023