Vicino/Lontano: il teme 2025 al è ‘scart’

Al è ‘scart’ la peraule clâf sielte dal festival “Vicino/Lontano” pe vincjesime prime edizion, in program a Udin di miercus ai 7 fint a domenie ai 11 di Mai. Al centri, come simpri, la serade avigniment pe consegne dal Premi leterari internazionâl tal non di Tiziano Terzani. ‘Scart’, cemût che a sclarissin i curadôrs, al fâs pensâ al dinei, ae esclusion e a ogni sorte di discriminazion, a une realtât discomude parcè che diferente: di cancelâ o dislontanâ ancje de cussience coletive. “Ma nô – a disin – o volìn provâ a ribaltâ il sens e la funzion par fâ une lint par osservâ il mont cuntune voglade incuiete e ‘curiose’…”. Tacant di cheste prospetive, il comitât sientific vuidât dal antropolic Nicola Gasbarro al invidarà ancjemò une volte a Udin studiôs, gjornaliscj, scritôrs e artiscj di lustri a confrontâsi tra di lôr e cul public par une setemane penze di incuintris, dibatiments, mostris, proiezions e spetacui vierts a ducj, sui temis de gjeopolitiche, dal ambient, de economie e de societât, de sience e de tecnologjie. Ai 10 di Mai tal Teatri gnûf “Giovanni da Udine” al vignarà consegnât il Premi “Terzani”. (A.I.) – 25.02.2025