Vierts i gnûfs dipuesits dal Museu di Aquilee

A son stâts screâts i gnûfs dipuesits dal Museu archeologjic nazionâl di Aquilee, un cjapitul impuartant dal percors di rinovament de istituzion che e fâs part dal Museu storic e Parc dal Cjistiel di Miramare – Direzion regjonâl dai Museus nazionâi dal Friûl-Vignesie Julie dal Ministeri de Culture. I gnûfs spazis, di vuê vierts al public, a ufrissin une vision esclusive dal patrimoni archeologjic di une des citâts plui impuartantis dal Imperi roman, contribuint in mût significatîf a inricjî il grant patrimoni storic e archeologjic di Aquilee. Il progjet al segne ancje une svoltade inte gjestion e valorizazion des colezions, garantint la conservazion otimâl di miârs di manufats che si podaran viodi pe prime volte, deventant une part dal percors museâl slargjât. Il fin al è chel di fâ de antighe istituzion, nassude intal 1882 sot dal Imperi austroongjarês, un lûc viert a ducj e di ufrî al public un strument di comprension e di cognossince dal sît Unesco di Aquilee. (A.I.) – 12.11.2024