Visite vuidade ae Gurize di re Carli X

Cui jerial Carli X prime di deventâ re di France e cun cui isal rivât a Gurize intal so esili? A chestis e a altris domandis si cirarà di dâ rispuestis miercus ai 6 tal Palaç Coronini a Gurize une visite vuidade, aes 5 dopomisdì, cul supuart di stampis, medaiis, piturâts e altris ogjets racuelts dai Coronini a ricuart dal timp passât intal lôr Palaç dai ultins Borbons di France. La visite programade e vûl ricostruî la storie dal re Carli X e dai siei dissendents, prime, dilunc e daspò de lôr permanence a Gurize. Al tiermin de visite, inte sale di gustâ dal Palaç, la L’Oca Golosa Pasticceria e ufrirà une cerce di cualchi dolç che si podeve cjatâ su la taule dal re Carli X: desserts monumentâi ispirâts aes ricetis senografichis dal grant chef francês Marie-Antoine Carême, calcolât il fondadôr de alte cusine moderne. (A.I.) – 05.11.2024