Al è tant interès viers la Italie, la sô storie e, dal sigûr, viers il Friûl. Al è ancje su chest interès che a àn di pontâ i Fogolârs, par proponi iniziativis al pas cui timps, par stuzigâ la curiositât, il desideri di cognossi la nestre realtât. E po a son ancje modei inovatîfs di ispirâsi.
E je la convinzion maduride di Barbara Bacchetti, studiose di tradizions popolârs e autore dai libris “Carnia. Terra di tradizioni”, “Agane. Fate d’acqua”, di là di jessi curadore di “Steit atenz, steit a sintî”, che l’Avrîl stât e à fat intune cul fi Alessio Favero un viaç in Australie, ospit di cualchi Fogolâr tra chei presints inte nazion disconfinade par presentâ i siei libris. Bacchetti e à partecipât a Sydney ai 2 di Avrîl, in ocasion de Fieste de Patrie dal Friûl, ai events organizâts dal locâl Fogolâr, che la presidente Lidia Gentilini i à dât un bon acet.
Ai 7 di Avrîl la visite al Fogolâr Furlan di Melbourne. In cheste ocasion, Alessio, iscrit al prin an dal liceu classic european dal Educandât Uccellis di Udin, al è intervignût prospetant la pussibilitât di un scambi tra students talians e australians, cemût che za al sucêt cun Europe, Canadà e Stâts Unîts. A jerin presints diviers coregjonâi emigrâts desenis di agns indaûr, che a àn doprât il furlan par presentâsi e fevelâ dai ricuarts leâts ae Patrie; la serade e je stade coordenade dal rapresentant dai Fogolârs australians e ancje segretari dal Fogolâr di Melbourne, Fred Martin, in presince dal so president Patrizia Corelli, che e à volût vê dongje i doi ospits pe Pasche. “La atmosfere e je stade familiâr – e conferme Bacchetti -. O ai sintût a clâr il calôr di un acet spontani, autentic, il sens di une fradilance e dal stâ insiemi ator de stesse taule deventât simpri plui râr”.
Ai 11 di Avrîl e je stade la volte dal Fogolâr di Adelaide vuidât di Marisa Baldassi. “Ducj a jerin impegnâts – e conte la scritore – a preparâ i gnocs. Tancj di lôr a jerin zovins. In chest Fogolâr al è sucedût alc di speciâl, une colaborazion tra gjenerazions. “Par esempli, inte direzion – e conte Bacchetti – al lavore di pôc timp Giovanni Freschi, di 26 agns, che, dopo jessi stât a Adelaide cualchi an indaûr e vê viodût che i anzians a sfadiavin a puartâ indenant lis iniziativis dal Fogolâr, al à cirût rinfuarçs in Friûl, cjapant fantats zovins e volenterôs che a àn dât il lôr contribût par che la associazion storiche e podès lâ indenant. Si son mitûts dongje cussì la storie e la esperience dai anzians cu la creativitât e la frescjece dai zovins, creant une formule plui che valide, un model di copiâ in altris realtâts che a son in dificoltât pe mancjance di ricambi intergjenerazionâl, un progjet pilote che si augure al vegni espuartât in curt inaltrò. La idee e je ancje di creâ une rêt, une conession par ducj chei che dal Friûl a volaressin fâ une esperience in Australie in mût che a vedin un riferiment, cualchidun che ju judi inte ricercje dal lavôr e dal lozament”.
La scritore e à regjistrât dopo adun cun Marisa Baldassi e cul fi une pontade di dôs oris de trasmission radiofoniche “Il Friûl e la sô int” de radio taliane 531 scoltade in dute la Australie; al è stât ancje un colegament cun Dino Persello dal Friûl, pardabon un artesan de peraule e dal teatri che al à cjacarât in maniere plasevule cun Barbara dal progjet dal Fogolâr di Adelaide.
Ai 15 di Avrîl la ultime tape, ospits dal Fogolâr di Dimbulah, localitât dal Nord Queensland, dulà che Bacchetti e à cjatât il president Deris Marin e il segretari Massimo Bianco dilunc di une serade plasevule di conversazion, dal sigûr in lenghe furlane. (A.D.G.) – 16.06.2023
