Il numar des impresis artesanâls in Friûl-Vignesie Julie al continue a cressi: plui 167 unitâts intal secont trimestri dal 2023, dopo che ancje il prin trimestri si jere sierât cuntun aument di 31 unitâts. La cressite e je in linie cun chê regjistrade intal stes periodi dal bieni di prime, ma tant plui sostignude a pet dal periodi pre Covid.
Gjavant il 2020, l’an de esplosion de pandemie cuant che il regjistri des aziendis artesanâls al à segnât un mancul 11 par cent, l’andament dal dopo pandemie “al mostre segnâi di vitalitât – al sclarìs cun otimisim il president di Confartesanât F-Vj Graziano Tilatti -. L’andament al somee che al dimostri une rinovade volontât di metisi in propri e di costruî di bessôi la proprie cariere professionâl. La cressite di une culture di imprese e je dal sigûr un aspiet interessant e di sostignî. No podìn però platâ che su chescj procès e menace la cuistion demografiche, par chê e covente che e sedi une atenzion costante de bande des istituzions”. Al conferme la leture positive il vicepresident regjonâl vicjari, Lino Calcina: “A son segnâi che a incoragjin e si augurìn che a puedin contaminâ i zovins, par che a sigurin un futûr al Friûl-Vignesie Julie. Dal report – al continue Calcina – al ven fûr, cun di plui, la dinamicitât di Triest, che e conferme il moment positîf che al è daûr a vivi il so teritori”. (a.d.g.) – 25.08.23
