A Pordenon il prin distributôr di libris

Al è stât screât tal Pôl Tecnologjic “Andrea Galvani” di Pordenon il prin “Bookstop” dal Friûl-Vignesie Julie. Il progjet al nas di une idee dal editôr Ediciclo, disvilupade in graciis de sinergjie cul Grup Illiria, e al segne un pas impuartant inte difusion de culture in spazis publics e inovatîfs. “Bookstop – Fâs une polse cuntun libri” al è un progjet di distribuzion culturâl inovatîf e al rapresente il simbul di une culture che e va fûr dai lûcs tradizionâi e si met in ambients gnûfs, puartant la leture dulà che mancul si le spiete, fasintle acessibile a ducj, in cualsisedi moment. Il Bookstop al è un distributôr che al conten 20 titui de golaine “Piçule filosofie di viaç” di Ediciclo: une racuelte di saçs curts che a invidin ae riflession su temis leâts al viaç, ae scuvierte e ae esperience personâl. (A.I.) – 07.04.2025