La prime stazion di furniment in Friûl-Vignesie Julie pai autos a idrogjen rinovabil e sarà fate dentri dal 2026 a Porpêt. Lu à comunicât il ministeri des Infrastruturis e dai Traspuarts, che al à publicât la liste des 36 stazions finanziadis cun 103 milions dal Pnrr in Italie. Par chel che al tocje la nestre regjon, chê di Porpêt e je la uniche in liste. A fâ il progjet di plui di 1,6 milions di euros e sarà la Q8 Petroleum Italie.
La gnove e je stade judicade in maniere positive dal president nazionâl de Figisc, il tumiecin Bruno Bearzi. “O vin sostignût simpri – al dîs il numar un dal sindicât dai gjestôrs dai implants stradâi carburants – che l’eletric nol è il futûr. Chest progjet al va inte direzion là che o vin sperât simpri. L’idrogjen – al continue – al pues jessi doprât dai motôrs termics atuâi cence modificazions particolârs, a diference dal eletric che al va a pericul di fânus dipendents de Cine”.
La nestre regjon e je in dut câs ae avanvuardie su chest front. L’an passât a Pontebe, intal autopuart di Sant Liopolt, al è stât screât il prin implant in Italie che al prodûs idrogjen, fat de societât sudtirolese Autoplose Sadobre. (A.D.G.) – 22.03.2023
