Pinsîr fuart a Muimans pe pierdite di puescj di vore dopo che a son stâts anunziâts de dirigjence de Radiators 50 licenziaments e 29 mancjâts rinovaments di contrats di soministrazion.
“La situazion alarmante – al aferme preocupât il conseîr regjonâl Massimiliano Pozzo – e impon une taule urgjente di confront cu la proprietât inglese par individuâ un plan industriâl bon di garantî il lavôr dal implant intal teritori cividin e di dâ duncje prospetivis futuris ai dipendents. L’auguri al è che la Regjon e fasi la sô part a difese di lavôr e ocupazion”.
“Il fat che a sedin cuasi 80 i dipendents a pericul suntun totâl di 290 unitât – al va indevant Pozzo -, al pues dome che creâ pinsîr fuart no dome pes fameis dai lavoradôrs cumò cjapâts in maniere direte, ma ancje pes prospetivis futuris di chest insediament impuartant. Ae taule di confront che i sindicâts a àn domandât, al è impuartant che ancje i assessôrs Bini e Rosolen a sburtin par rivâ a un plan industriâl che al eviti une derive dramatiche”. (a.d.g.) – 10.10.23
