Al à scomençât a lavorâ vuê, lunis ai 9 di Otubar, il gnûf consei de Cjamare di Cumierç di Pordenon-Udin. Al ordin dal dì, la elezion dal president: par aclamazion al è stât confermât al vertiç dal ent Giovanni Da Pozzo, che al à za vuidât la Cjamare di Cumierç intal delicât prin mandât dopo la incorporazion tra lis dôs realtâts di Pordenon e di Udin. A tignî a batisim il gnûf cors, ancje il segretari gjenerâl di Unioncamere Giuseppe Tripoli e l’assessôr aes Ativitâts produtivis de Regjon Sergio Emidio Bini.
Dopo un prin mandât “là che o vin puartât ae plene integrazion i servizis e lis struturis des realtâts de Cjamare dai doi teritoris – al à comentât il president -, compit no facil, ma che o sin rivâts a fâ ben in graciis dal impegn di dut il nestri personâl, e cundut che o vin operât in cundizions ecezionâls determinadis di avigniments come il Covid e la situazion gjeopolitiche internazionâl cetant che mai complesse, si preparìn a frontâ un secont mandât cun plui esperience e cussience su lis spalis, cun relazions otimis intiessudis tra i puartevôs de economie di ducj i doi i teritoris e la Regjon, e ancje cun fiducie intes capacitâts di un sisteme che al è rivât a vuê cun preparazion, inteligjence e definizion”. Da Pozzo al à dit ancje de decision di incorporâ intune uniche realtât societarie lis dôs struturis de Cjamare che si interessin de promozion, o sedi I.Ter scrl a Udin e Concentro a Pordenon, “altri segn de capacitât e de volontât di fâ sintesi, par ufrî simpri servizis miôr al teritori, aes impresis e ai citadins”. (a.d.g.) – 09.10.23
