Il stop imponût de emergjence Covid al è, par fortune, dome un ricuart lontan. Al cjape simpri plui fuarce, confuartât di numars che a cressin di gnûf, “Fabbriche aperte”, il progjet di Confindustria Udine, rivât ae sô vincjesime seconde edizion, che al ufrìs la pussibilitât a students e insegnants di cognossi plui di dongje il mont de imprese traviers un program di visitis ai implants di aziendis des diviersis tipologjiis produtivis che a rapresentin la specificitât de industrie furlane, par aprofondî i aspiets organizatîfs, produtîfs, tecnologjics e che us son inovâts.
Lis visitis vuidadis a scomençaran lunis ai 20 di Novembar par lâ indevant fin a martars ai 28 di Novembar. Lis 24 aziendis (a jerin 19 intal 2022) a acetaran cuasi 600 students di 5 istitûts des scuelis tecnichis e professionâls de nestre provincie. “Fabbriche aperte” si met intal cont plui ampli di iniziativis di ‘Spirt di Imprese’, l’inovatîf e struturât progjet di Confindustrie Udin dreçât a favorî la gjenerazion di gnove imprenditorialitât, a fâ vignî sù i talents scuindûts zovins tra i bancs di scuele e, inte stesse suaze, a contrastâ, intal medi lunc periodi, il fenomen dal disalineament tra la domande di profîi professionâi specifics de bande des aziendis dal nestri teritori e la disponibilitât di profîi formâts.
A vierzaran lis puartis dai propris implants: Acciaieria Fonderia Cividale di Cividât, AWM di Magnan in Riviere, Calzavara di Basilian, Compositech di Martignà, Danieli & C. Officine Meccaniche di Buri, Fantoni di Osôf, Fornaci di Manzan, Friulsider di S. Zuan dal Nadison, I.Co.P. di Basilian, Idealservice di Rivis Darcjan, La-Con di Vile Santute, Legnolandia di For disore, LimaCorporate di Vilegnove di S. Denêl, Maddalena di Paulêt, Mec 2 di S. Denêl, Meccanotecnica di S. Denêl, Mechatronics di Trasaghis, Metalworld di Pavie, Modine di Amâr e di Pucinie, Net di S. Zorç di Noiâr, Sisecam di S.t Zorç di Noiâr, Taghleef di S. Zorç di Noiâr e Thermokey di Rivignan.
Il progjet al cjape i students e i insegnants di chescj 5 istitûts scolastics: ITT de Basse Furlane di Çarvignan, D’Aronco di Glemone, Malignani di Udin, Solari di Tumieç e Bearzi di Udin. (a.d.g.) – 16.11.2023
