Vuê sotscrit inte sede de Comunitât Piergiorgio a Udin l’acuardi tra la Onlus e la Consulte regjonâl des associazions des personis cun disabilitât e des lôr fameis dal Friûl-Vignesie Julie – Odv (CRAD) cul obietîf di unî lis competencis specifichis e ufrî une consulence specializade sui supuarts disponibii e su lis barieris architetonichis sul teritori de nestre regjon.
La Comunitât Piergiorgio, traviers l’Ufici H, e furnìs za a gratis informazions sui aiûts pe autonomie e, plui in gjenerâl, su dut ce che al rivuarde la disabilitât. Il CRAD, invezit, al gjestìs il Centri regjonâl di informazion su barieris architetonichis e acessibilitât (CRIBA), che dal 2018 al è il centri unic di riferiment in regjon, jessint specializât intai temis de edilizie, dai traspuarts e de normative inerente (jurisprudence, agjevolazions fiscâls, contribûts publics).
Al è duncje inte otiche di integrazion e di infuartiment dai servizis teritoriâi aes personis cun disabilitât che vuê al è stât sotscrit l’acuardi di colaborazion tra i doi ents, rapresentâts di Aldo Galande, president de Comunitât Piergiorgio, e Mario Brancati, president dal CRAD FVj.
Ae firme a jerin presints ancje Michele Franz, diretôr dal CRIBA Fvj, Roberta Zona, president de Consulte dal Lusinç, Monica Ventura, segretarie dal CRAD Fvj e Federico Pirone, assessôr ae Istruzion, Universitât e Culture dal Comun di Udin. (a.d.g.) – 13.09.23
