Boletis simpri plui altis, fameis e impresis piçulis sot atac di pratichis comerciâls par nuie justis, int tormentade des telefonadis dai call center che no dan padin e, soredut, simpri plui fameis che a fasin fadie a paiâ il cont di une energjie simpri plui costose. E je la situazion saltade fûr vuê de cunvigne inmaneade de associazion Consumatori attivi li dal palaç de Regjon a Udin, indulà che a jerin presints une vore di esperts dal setôr in plui dal assessôr regjonâl aes Financis Barbara Zilli e dal onorevul di Fratelli d’Italia Letizia Giorgianni, componente de cuinte Comission de Cjamare dai Deputâts.
Zilli e à visât che la Regjon e je une vore impegnade tal dâ une man ai citadins e aes impresis ancje in graciis dai invistiments a pro dal fotovoltaic, tant che intai ultins trê agns e à metût a disposizion 300 milions di euros, cence dismenteâsi dal progjet dedicât al idrogjen.
Tancj i relatôrs presints e par brevitât o segnaln dal intervent di Luigi Gabriele, president de associazion nazionâl Consumerismo, che al à fevelât cence miezis peraulis dai problemis puartâts di une liberalizazion dal marcjât de energjie cence controi e difesis cuintri i tancj che a speculin su la schene de int. Gabriele al à ancje visât che par dâ cuintri cheste situazion la int e fasarès ben di cirî di no strassâ energjie e, indulà che si pues, doprâ il fotovoltaic par fâ sbassâ i presits masse alts. Graziano Tilatti, president di Confartigianato, al à contât di trop che lis impresis a patissin la pratiche tignude tant che scorete di fâ paiâ aes impresis boletis di acont simpri masse altis e di cemût che i imprenditôrs a stan cirint di sparagnâ ancje in graciis dal fotovoltaic, cu la sperance che prest al sedi pussibil doprâ une vore il strument de comunitât energjetiche rinovabil (Cer). Luca Picco de Caritas di Udin al à sotlineât trop grivie che a sedi la situazion no dome pai compuartaments scorets di chei che a cirin di fâ contrats clamant al telefon la int, ma ancje dal probleme simpri plui grivi des fameis che no rivin a stâ daûr al cost de bolete simpri plui alt, bolete che e je cressude tal zîr di pôcs mês dal 30%.
Barbara Venuti, vicepresidente di Consumatori Attivi, e à sierât la cunvigne visant che al sarâ impuartant inmaneâ un osservatori indulà che dutis lis domandis e lis ideis saltadis fûr dal apontament a puedin puartâ ae propueste di soluzions, ancje parcè che ducj i presints a àn dit a clâr che cussì la crisi e va a risi di jessi piês di chê di doi agns indaûr. Intant in curt Consumatori attivi, adun cun Consumerismo e cun Assium (Associazione italiana utility manager), rapresentade pe ocasion dal president talian Federico Bevilacqua e dal president regjonâl Andrea Lodolo, a vierzaran un sportel par judâ la int a movisi te jungle par nuie clare dai contrats pe energjie eletriche. (a.d.g.) – 17.02.2025
