“Cjarbon libar” al è l’obietîf di rivâ dentri dal 2027. Ve chi parcé de prime vendite di credits di CO2 su base volontarie dal Consorzio Boschi Carnici al Consorzio acquedotto Friuli centrale Spa (Cafc), che al smire a une riduzion progressive des straçariis des risorsis naturâls e al contigniment dai consums energjetics, ridusint l’impat gjenerât des emissions de aziende e “compensant” cul acuist di credits di carboni. La firme de convenzion e je sucedude vuê a Udin inte sede de Regjon, in presince dal assessôr regjonâl Stefano Zannier e dai doi presidents Salvatore Benigno (Cafc) e Luigi Cacitti (Consorzio). A mancul di un an di distance de prime certificazion nazionâl dai credits di sostignibilitât di buinis pratichis di gjestion forestâl, seconde il standard Pefc, il progjet dal Consorzio Boschi Carnici sul carboni forestâl al segne un gnûf impuartant travuart.
“O vin crodût in chest progjet – al aferme Benigno – parcè cuistìn credits di carboni di un sogjet locâl e no intal marcjât globâl, a conferme de atenzion dal Cafc al propri teritori”.
“Un prin fondamentâl pas – al zonte Cacitti – pe struturazion di un marcjât su base volontarie dai credits di carboni gjenerâts des nestris forestis, là che o contìn di cjapâ dutis lis aministrazions publichis proprietariis di superficiis boschivis. Al è un cambi fuart di pas dal Consorzi, sucedût in graciis de poie dai sindics consorziâts, al nestri personâl cualificât une vore e soredut al assessôr regjonâl Zannier, che di daurman al à condividût lis gnovis progjetualitâts metudis in cjamp dal nestri ent, sigurant un supuart essenziâl pe cressite dal Consorzi stes tant che braç operatîf de Regjon in cheste part di teritori di mont”.
Cafc dal 2019 al cuvierç il so bisugn di energjie eletriche ricorint dome aes fonts rinovabilis, contribuint in maniere direte al contigniment de proprie olme carboniche; lu fâs cuantificant il propri impat ambientâl midiant la contabilizazion de olme carboniche des propriis ativitâts aziendâls, rindicontant lis emissions anuâls aziendâls, in mût complet, curât e trasparent, analizant lis oportunitâts di miorament, fissant obietîfs di morestament coerentis, planificant ativitât di riduzion, monitorant intal timp lis prestazions rivadis. “Lis azions dal Consorzi par ridusi la proprie olme di carboni – al à sclarît il president Benigno – di là di ativitâts diretis cemût che la compensazion cu l’acuist dai credits di carboni di ents certificâts, a rivuardin l’eficientament energjetic dai implants, cun invistiments specifics intai depuradôrs di Udin, Tumieç, Sant Zorç di Noiâr; la riduzion dai combustibii fossii e la sostituzion cun fonts rinovabilis, par esempli disfrutant biogàs dal implant di depurazion di Sant Zorç di Noiâr”. (A.D.G.) – 20.01.2023
