Pe realizazion dal pôl di Budoie il Grup Ceccarelli, tra i plui impuartants intal setôr de logjistiche e dai traspuarts, al à recuperât la storiche fabriche di mobii de Poletti Spa, cuntun invistiment di 5 milions di euros.
“Si trate – al à sclarît Luca Ceccarelli – di un dai invistiments operâts plui grues inte storie dal Grup”.
Il gnûf pôl logjistic inte Zone Industriâl di Budoie al sarà operatîf dentri dai prins di Jugn, si slargje su 40 mil metris cuadris cuntun grant plaçâl pe fermade e la movimentazion dai veicui e in futûr al sarà furnît cun areis pe ricjarie eletriche dai veicui. La struture, ristruturade ad implen, e dispon di mil metris cuadris dedicâts ai uficis e di 16 mil metris cuadris di magazen. Dentri de aree al sarà costruît un altri magazen dedicât al imagazenament di batariis al liti, stant lis problematichis dal pont di viste de prevenzion fûcs e simpri plui difondudis in setôrs industriâi moltepliçs.
Par ce che al tocje lis risorsis umanis, a lavoraran intal pôl pordenonês dôs personis in ufici e 6 in magazen, che a laran sù a 8 a pene che si rivarà a plen regjim. (A.D.G.) – 03.05.2023
