La gnove investigazion fate de Isnart par cont des Cjamaris di Cumierç di Pordenon-Udin e de Vignesie Julie, in colaborazion cun Promoturismo Fvg, e à permetût di piturâ l’identikit dal cicloturist che al dopre la Ciclovie Pedemontana Fvg-3.
Si trate di int che e à une etât tra i 26 e i 55 agns e che e rive soredut de Lombardie (26,5%), dal Venit (20%) e dal Piemont (12,5%). Si trate di un apassionât usât a inmaneâ lis vacancis di bessôl (99,5%) e a meti dongje la ativitât sportive, al viaze soredut in cubie (55%) o cui amîs (28,5%) e si môf soredut cu la biciclete di proprietât (l’afit di bicicletis al è fat dome intal 18,5% dai câs).
La ufierte turistiche de nestre regjon e je valutade une vore ben e cui che al rive al profite par visitâ lis bielecis dal nestri teritori. Il vôt dât di chescj visitadôrs al è 8 o ancje di plui tal 92,5% dai câs e la buine gracie e ospitalitât e à cjapât un vôt di 7 in sù tal 96,5% dai câs, intant che il mangjâ e bevi e vâl dal 7 in sù tal 98% dai câs. (a.d.g.) – 20.01.2025
