“Al è impuartant rinfuarçâ la colaborazion industriâl cui Balcans par tornâ a svicinâ ae Europe ocidentâl tocs di filiere produtive fondamentâi pe nestre economie, che intai ultins decenis a son stâts delegâts magari cussì no al Orient Estrem. Lis clâfs decisionâls dai procès produtîfs no puedin jessi consegnadis intes mans di Paîs tierçs che pôc a àn a ce fâ cu la democrazie. Ve parcè che l’intensificasi des relazions comerciâls cu la Serbie e je une oportunitât no dome pal Friûl-Vignesie Julie e la Italie, ma par dute la Europe: chi si fevele di une part fondamentâl dal nestri futûr, dulà che plui fuarte e je la rêt di relazions tra i Paîs, plui a saran difindûts i principis democratics e di libertât, tant pe Europe ocidentâl che pai Balcans stes”. Chest, in sintesi, il pinsîr dal governadôr de Regjon Massimiliano Fedriga vuê al Pordenone Business forum transadriatic “Un partenariato Italia-Serbia per la prosperità nei Balcani”.
Fin dal avigniment il dialic e il confront sui temis leâts ae rêt di cooperazion tra i doi Paîs là che il Friûl-Vignesie Julie al rivistìs un rûl strategjic di regjon puint. Fedriga al à puartât il salût de Regjon al seminari dedicât aes oportunitâts intal cjamp dai invistiments bilaterâi, ae presince, tra chei altris, dal president di Confindustria Alto Adriatico Michelangelo Agrusti e dal president serp di Confindustrie Patrizio Dei Tos. (a.d.g.) – 02.02.2024
