In Friûl-Vignesie Julie al mancje il 76% dai eletriciscj e il 77% dai idraulics. No je tregue al afan vivût de edilizie che e continue a patî la mancjance di lavoranzie. “O regjistrìn une carence tant grave di personâl in ducj i setôrs des costruzions”, al denunzie Lucio Copetti, a cjâf de categorie Implants eletrics di Confartigianato-Imprese di Udin.
“Il lavôr al è – al zonte –, ma la plui part des impresis artesanis no je in cundizion di fâsi cjame propit parcè che al mancje personâl. O sin al paradòs”.
Une situazion che i dâts Excelsior Unioncamere a fotografin cun esatece. Intal 2022 in F-Vj lis jentradis di eletriciscj programadis des impresis al jere di 1.530, che il 76% di lr, al vâl a dî cuasi 8 su 10, di reperiment dificil. Lis causis? Mancjance di candidâts (52,8%), preparazion inadate (40,5%), altris motîfs (6,7%). Stesse situazion sul front dai termoidraulics: 960 lis jentradis programadis intal 2022, di chestis il 77% di reperiment dificil, in chest câs fintremai al 85% par mancjance di candidâts. (A.D.G.) – 06.07.2023
