Lis aziendis dal F-vj a fasaressin ben a segnâ la date dal 2030 cerclantle in ros. Al è l’an indulà che il famôs biolic inglês John Beddington, intal 2009, al à metût il “burlaç perfet” leât a miseriis alimentârs, idrichis e a coscj energjetics. Il so calcul nol varès di falâ di masse: ve parcè che, viodût il leam tra la recession di cumò e la “burlaç perfet”, al è cetant che mai necessari e urgjente invistî vuê in infrastruturis e tecnologjiis che a permetin di evitâ dams incalcolabii domans.
Al è stât chest il resonament di fonts de cunvigne organizade vuê dopomisdì di Confindustria Udine e promovût de Comission Sostignibilitât de Associazion dai industriâi furlans, dal titul: “Il Cambiament climatic in F-vj e l’impat su lis impresis: adatament, moderazion e gnovis tecnologjiis”.
Il moment di agjî par prevignî la emergjence climatiche e je cumò. Confindustrie si impegne a judâ lis impresis in cheste sfide, esplorant lis oportunitâts al centri de transizion ecologjiche e difondint culture e informazions sui passaçs concrets di implementâ intai modei di afâr. A esistin di fat ciertis cundizions di meti in pratiche par facilitâ e incressi la eficacitât de azion dal setôr privât. No si partìs di sigûr di zero: intai ultins agns, lis impresis a àn moltiplicât i sfuarçs par ridusi il lôr impat ambientâl, cuntune atenzion particolâr su lis energjiis rinovabilis e su la eficience energjetiche dai procès di produzion, acelerât de crisi energjetiche in at.
“Il F-vj – a àn visât Maurizio Fermeglia e Andrea Mio, de Universitât di Triest, viodûts i risultâts di un studi puartât indevant dal Ateneu di Triest su incarghe de Comission Sostignibilitât di Confindustrie Udin. – e je une des zonis plui sensibilis al aument de temperadure globâl di un grât e mieç – doi. Viodude la presince svicinade di doi ‘hot-spot’ come il Mediterani e lis Alps, indulà che l’aument de temperadure al è destinât a passâ i doi grâts, i efiets dal riscjaldament a saran probabilmentri ancjemò plui dramatics inte nestre regjon. Fenomens tant che fûcs, sec, aluvions, che o vin viodût in chescj ultins agns, duncje a son destinâts a tornâ cun plui frecuence e viamence”. (ADG) – 11.11.2022
