Coni fiscâl, la delusion de Cgil: tai insuficient e temporani

“E je une misure insuficiente e cun di plui di durade limitade. O sin lontans di chel che al covente par difindi il podê di acuist dai dipendents”. Il segretari regjonâl Villiam Pezzetta al sintetize cussì la insodisfazion de Cgil pes misuris sul tai dal coni fiscâl previodudis dal Document di economie e finance dal Guvier. “Tignint cont des primis stimis – al sclarìs – o stin fevelant di beneficis tant bas in tiermins di redit net. Dut chest devant di une inflazion che intal 2022 e à viazât in dople cifre e che e continue a cori a ritmis sostignûts e a une vore di contrats nazionâi no rinovâts, sedi dal lavôr privât che intal implei public”. Masse pôc, insume, e a rinfuarçâ la delusion, pe Cgil, al è il judizi negatîf su sieltis tant che la estension a 85 mil euros de flat tax pai autonoms, za lade dentri inte finanziarie 2023, e la assence di misuris pal infuartiment dal contrast ae evasion. “O vin pôre che dut chest – al sclarìs ancjemò Pezzetta – al pesarà ancje in tiermins di tais ae spese sociâl, lassant ai dipendents lavoradôrs dome i fruçons e nuie ai pensionâts. Ve chi parcè che lis resons de nestre mobilitazion a son no dome confermadis, ma fintremai rinfuarçadis”. (A.D.G.) – 12.04.2023