Valutazion dai bisugns energjetics, ûs atent de risorse idriche ae lûs dai mudaments climatics caraterizâts di un progressîf sbassament des faldis, cost dai consums energjetics che, intal 2022, al à regjistrât une impenade des boletis che e à metût a prove dure i belançs dai consorzis di bonifiche. A son lis urgjencis tratadis al consei de Associazion dai consorzis di bonifiche de regjon – formât dai presidents de Planure Furlane, Rosanna Clocchiatti, de Ciline Midune, Valter Colussi, e de Vignesie Julie, Enzo Lorenzon – dât adun in presince dal assessôr regjonâl aes Risorsis agroalimentârs, forestâls e itichis e mont Stefano Zannier.
“Intal 2022 lis fitancis consortîi no son stadis suficients nancje a fâ front aes spesis pe energjie di funzionament dai implants – e à evidenziât il president de associazion Rosanna Clocchiatti -. Devant di cheste situazion al è someât necessari a ducj i consorzis cjatâ altris risorsis par sostignî il bisugn energjetic e sigurâ l’ecuilibri di belanç. Al jere intal stes timp il pinsîr, sintût ancje intes associazions di categorie e intal mont istituzionâl, di difindi i redits des impresis agriculis e duncje di contignî i auments des fitancis pal an 2022 e 2023 al stret necessari par sigurâ la ativitât consortîl”. Decisîf l’intervent regjonâl che, cuntun contribût di 7 milions di euros al sisteme consorzis pal abatiment dai coscj energjetics, al à permetût di sigurâ la pate di belanç dal 2022, e al à sbassât il deficit energjetic che al à tocjât intal 2022 la cifre di 15,2 milions di euros cuntun aument di 8,8 milions e duncje dal 136% a pet de medie dal trieni.
“La situazion straordenarie relative ai coscj energjetics – al à sotlineât l’assessôr Zannier – e podeve dome che jessi frontade in tiermins urgjents cuntun impegn economic impuartant de bande de Regjon, in cetant il sisteme dai Consorzis di bonifiche no varès podût rezi dome cu lis fuarcis che a derivin dai propris belançs. Cence fal e sarès stade un aument de domande economiche ai consorziâts che a varessin vût di fâsi cjame totâl dal probleme. Chest no si podeve acetâ, stant che ducj i consorziâts a varessin patît coscj insostignibii metint a pericul dut il compart”.
L’obietîf, dut câs, nol è stât dome di contignî i coscj, ma ancje cjalâ al futûr traviers il trasferiment ai consorzis di bonifiche di 24,2 milions di euros pe realizazion di piçui bacins artificiai che – cence savoltaments dal teritori, ma dome doprant la conformazion morfologjiche normâl dai terens e gjavis dismetudis – a permetaran di cumulâ la risorse idriche e doprâle intai moments di plui dibisugne. I 12 intervents previodûts, che a saran fats dai consorzis di bonifiche, almancul 3 par ogni consorzi, a contribuiran a frontâ situazions di sec che a podaressin jessi simpri plui fissis e intensis. Obietîf analic al à l’aument des risorsis pe progjetazion di gnovis oparis par bagnâ, simpri a pro dai consorzis di bonifiche, alçât a 500 mil euros. A saran fats cussì implants di trasformazion par bagnâ orientâts al sparagn e al ûs eficient de aghe.
“I intervents metûts in cjamp de aministrazion regjonâl – e à dit ancjemò Clocchiatti – a confermin la vicinance de Regjon F-Vj ai problemis e aes criticitâts dal mont agricul, in particolâr al compart de bonifiche, e i sfuarçs in at par passâju. O cognossìn al assessôr Zannier l’impegn profondût e i obietîfs rivâts; mai in chescj agns e je vignude mancul la colaborazion cu la Regjon, che si è pandude decisive par chei che a impuartin travuarts rivâts a difese de agriculture dai nestris teritoris, pe valorizazion dai prodots e a tutele dal redit des aziendis agriculis”. (A.D.G.) – 24.02.2023
