“Il piês al somee che al sedi passât par chel che al rivuarde il cost de energjie, ma al è ben jessi prudents e programâ, ce che no vin fat intai decenis passâts. Cjalant in prospetive, duncje, a son benvignudis dutis lis misuris che a intervegnin in mût plui struturâl su la diversificazion des fonts, ancje e soredut sburtant su lis rinovabilis. Se chest al è il nestri obietîf strategjic, o scugnìn, tal stes timp, fâ in mût che dutis lis misuris buinis a sedin cjapadis cun efiet imediât. Par fâlu, dal sigûr, a àn di jessi cognossudis, sclaridis e promovudis”.
Cussì, il vicepresident di Confindustria Udine, Anna Mareschi Danieli, e à viert chest dopomisdì a palaç Torriani l’incuintri di aprofondiment, promovût dai Industriâi furlans in colaborazion cu la Regjon F-Vj, sul bant regjonâl pal ûs des energjiis rinovabilis, che dilunc di chel a son intervignûts ancje Marco Bruseschi, president de Comission Energjie di Confindustrie Udin, Sergio Emidio Bini e Magda Uliana, in maniere rispetive assessôr e diretôr centrâl des Ativitâts produtivis e turisim de Regjon F-Vj, e Fabrizio Corte, responsabil dai aspiets tecnics dal bant.
Ai 15 di Fevrâr passât al è stât viert di fat il Bant regjonâl pe produzion e l’autoconsum de energjie eletriche e termiche di fonts rinovabilis. Confindustria Udin e à volût duncje organizâ chest incuintri cul fin di sclarî ducj i aspiets che a integnin ae acessibilitât concrete a cheste misure impuartante di poie al ûs des energjiis rinovabilis intes aziendis dal teritori, che intal arc dal ultin an a àn patît in maniere pesante i efiets de energjie cetant cjare. (A.D.G.) – 27.02.2023
